Òrgans de govern i funcions

AGUEST EI UN ÒRGAN QUE RECUELH ER ARTICLE 32 DERA LEI 1/2015, DE 5 DE HEREUÈR, DETH REGIM ESPECIAU D'ARAN.

CAPITOL VII

DERA COMISSION D’OÏDORS DE COMPDES

Article 53.-

Era Comission d’Oïdors de Compdes ei designada especiauments entà revisar e informar es compdes deth Conselh e de toti es organismes autonòms que d’eth ne depenen, corresponents ar exercici anterior.

Article 54.-

Ena Comission d’Oïdors de Compdes auràn d’èster representats toti es partits politics damb representacion en Conselh, en tot representar damb un vòt ponderat as conselhèrs deth sòn grop.

Article 55.-

1. Acabat er examen e revision des compdes, era Comission emeterà un informe en quau se harà a constar, s’arribèsse eth cas, totes es irregularitats e defèctes que s’agen observat e es prepauses que se hèsquen ath Plen entara sua correccion. Es membres dera Comission poiràn hèr a constar ara fin der informe, damb caractèr de vòt particular, es observacions e prepauses que non agen estat recuelhudes.

2. Er informe dera Comission aurà d’èster emetut en tèrme maxim de dus (2) mesi a compdar des deth moment en que li age estat balhada era documentacion complèta.

Article 56.-

Es Compdes e er informe dera Comission seràn expausadi ath public per un periòde non inferior a quinze (15) dies e, ara seguida, enviats ath Plen entara sua aprobacion o rectificacion.

Article 57.-

Era Comission d’Oïdors de Compdes poirà sollicitar era collaboracion e er assessorament de tecnics especialistes, atau coma era contractacion d’un servici d’auditoria extèrna.

AGUEST EI UN ÒRGAN QUE RECUELH ER ARTICLE 31 DERA LEI 1/2015, DE 5 DE HEREUÈR, DETH REGIM ESPECIAU D'ARAN.

CAPITOL IV

DETH CONSELH DE GOVÈRN

Article 66.- (modificat en session plenària de 12/07/1995)

Eth Conselh de Govèrn ei integrat peth sindic e es tres vicesindics que seràn nomentats entà formar part d’aguest Conselh per decrèt deth sindic.

Article 67.-

Ei competéncia deth Conselh de Govèrn er assessorament e assisténcia ath sindic, er estudi de totes es prepauses que aguest li sosméte, atau coma es que li presenten es conselhèrs-delegats, e era adopcion d’acòrds sus competéncies en eth delegades peth sindic e peth Plen deth Conselh.

Article 68.-   Sessions Ordinàries deth Conselh de Govèrn (modificat enes sessions plenàries de 12/07/1995, de 05/08/1999, de 14/07/2003, de 20/07/2007, de 12/07/2011 e de 15/06/2015)

1. Eth Conselh de Govèrn celebrarà es sessions ordinàries damb ua periodicitat quinzenau. Eth dia de celebracion serà es deluns dera prumèra e tresau setmana de cada mes, preferentament tàs 10:00 ores o entàs 18:00 ores. Non i aurà cap de session ordinària pendent eth mes d’agost.

2. S’eth dia preestablit entara celebracion dera session ordinària coincidís damb dia hestèr, serà d’aplicacion çò previst en article 25 d’aguest Reglament.

Article 69.-

1. Correspon ath sindic era convocatòria deth Conselh de Govèrn e era determinacion der Orde deth dia.

2. Era convocatòria deth Conselh de Govèrn se realizarà damb un minim de dus dies d’auança.

Article 70.-

Eth sindic poirà convocar sessions deth Conselh de Govèrn damb caractèr extraordinari e damb caractèr d’urgéncia, en tot èster d’aplicacion aquerò previst entàs sessions plenàries d’aguest tipe, atau coma en aquerò referent ath contiengut der Orde deth dia.

Article 71.-

1. Eth Conselh de Govèrn serà validament constituït damb era assisténcia dera majoria des sòns membres, damb un minim de tres.

2. Es sessions deth Conselh de Govèrn non son publiques.

Article 72.-

Es acòrds deth Conselh de Govèrn se prenen per majoria simple e, en cas d’empat, decidirà eth vòt qualificat deth sindic.

Article 73.-

Des sessions se lheuarà acta, damb era madeisha solemnitat qu’es actes deth Plen. Un còp sigue aprovada, se trameterà a toti es conselhèrs, e s’expausarà en taulèr d’anoncis dera sedença deth Conselh Generau.

Eth Sindic ei era maxima Autoritat deth Govèrn e dera Administracion d’Aran.

Eth Sindic a era mès nauta representacion deth Conselh Generau d’Aran. Tanben a era representacion ordinària dera Generalitat en Aran.

Eth Sindic ei elegit peth Plen deth Conselh Generua d’Aran.

Es sues competéncies son aquères que dispause er article 29 dera Lei 1/2015, de 5 de hereuèr, deth Regim Especiau d’Aran.

CAPITOL I

DETH SINDIC

Article 58.-   (modificat ena session plenària de 14/08/2015)

Eth sindic a es atribucions que li assigne er article 29 dera Lei 1/2015, de 5 de hereuèr, deth Regim Especiau d’Aran.

Article 59.-

En cas d’abséncia o impediment, le remplaçarà enes sues foncions es vicesindics per orden de prelacion deth sòn nomentament. Era substitucion non poirà auer efèctes per un periòde superior a dus (2) mesi.

Article 60.-

1. Es decrèts e resolucions deth sindic s’inscriueràn en Libre de registre corresponent.

2. Entad aguest registre, serà d’aplicacion era normativa establida entàs Libres d’actes.

TÍTOL III

DETH PLEN DETH CONSELH GENERAU

CAPITOL I

SESSIONS E COMPETÉNCIES

Article 19.-

Eth Plen ei er organ suprem de manifestacion dera volentat deth Conselh Generau d'Aran, e ei integrat per 13 conselhèrs e presidit peth sindic o vicesindic que legauments lo remplace.

Article 20.-   (modificat ena session plenària de 14/08/2015)

Ei competéncia deth Plen es senhalades en article 28 dera Lei 1/2015, de 5 de hereuèr, deth Regim Especiau d’Aran, e aqueres que li siguen assignades pes leis sectoriaus.

Article 21.-

Es sessions deth Conselh pòden èster ordinàries e extraordinàries, e aguestes darrères, ath viatge, pòden èster urgentes.

Es sessions extraordinàries son convocades entà resòlver ahèrs que precisen èster tractats de manèra singulara o, que per rason d’urgéncia, non pòden demorar enquiara celebracion dera session ordinària.

CONVOCATÒRIA DES PLENS E ORDE DETH DIA

Article 24.-   (modificat enes sessions plenàries de 12/07/1995 e de 05/08/1999)

1. Eth Plen deth Conselh s’amassarà en session plenària ordinària, coma minim, cada dus mesi e en session extraordinària quan atau ac decidisque eth sindic o ac sollicite era quatau part, aumens, deth nombre legau des conselhèrs deth Conselh Generau, sense que cap de conselhèr ne pogue sollicitar mès de tres annauments.

2. Enes Plens ordinaris era part dedicada ath contròtle des auti organs deth Conselh Generau aurà de presentar ua substantivitat pròpria e diferenciada dera part resolutiva, en tot auer-se de garantir de forma efectiva en sòn foncionament e, en tot cas, ena sua regulacion, era participacion de toti es grops politics ena formulacion de plecs, demandes e mocions.

Article 25.-    Sessions Plenàries Ordinàries (modificat enes sessions plenàries de 12/05/1995, de 05/08/1999, de 14/07/2003, de 20/07/2007, de 12/07/2011 e de 15/06/2015)

1. Es sessions ordinàries se celebraràn eth darrèr deluns deth dusau mes de cada bimèstre, ei a díder, hereuèr, abriu, junh, octobre e deseme. Eth mes d’agost se considerarà inabil en tot trasladar-se era celebracion dera session ordinària corresponenta ad aguest mes laguens dera prumèra quinzea deth mes de seteme.

2. S’eth dia preestablit entara celebracion dera session ordinària coincidís damb dia hestèr poirà celebrar-se eth Plen, damb eth madeish caractèr ordinari, eth dia anterior o eth posterior.

3. Era ora de celebracion serà preferentament tàs 12.00 ores, se ben açò se pòt modificar per acòrd deth Plen damb eth vòt favorable dera majoria absoluda des conselhèrs.

4. Se faculte ara Sindicatura pr’amor qu’en cas justificat e prealabla informacion as Magnifics conselhèrs portavèus des grops politics qu’intègren era corporacion, se pogue variar eth dia previst entara corresponenta session ordinària.

Article 26.-   Convocatòria des Sessions

Es sessions ordinàries seràn convocades damb ua auança minima de dus dies obrants. Es extraordinàries damb 48 ores, e es extraordinàries damb caractèr d’urgéncia, damb era auança qu’eth sindic creigue convenienta, en tot auer-se de ratificar era urgéncia coma prumèr punt der Orde deth dia, damb eth vòt favorable dera majoria absoluda des membres assistents ath Plen; en cas d’empat, dirimirà eth vòt de qualitat deth Sindic.

Article 32.- (modificat ena session plenària de 05/08/1999)

1. Es Plens se celebraràn ena Sala de sessions dera sedença oficiau dethConselh Generau d’Aran, o ben ena Sala de sessions dera Casa deth Senhor d’Arròs abilitada ar efècte, en vertut d’acòrd plenari de 24 de hereuèr de 1999.
2. Se per motius de fòrça majora era session non se poguesse celebrar enes lòcs nomentadi, eth Plen poirà acordar era celebracion dera session en un aute lòc apropriat.